وش وراكم هالمرة يالاتصالات السعودية (مجاناً 24 ساعة 30 يوم)؟!
أبارك لعملاء الجوال على العرض الجديد الغريب حق شركة الاتصالات السعودية واللي طلع في توقيت غريب (مع العيد والحج والإجازة والبرد والطفرة) !
وبحكم خبرتي المتواضعة في التعامل مع هالشركة وكشف الـ(خبث) اللي ورا هالإعلانات – وأردى منهم موبايلي وزين – ، انهبلت يوم سمعت عن الإعلان الجديد لأنه طلع في وقت يعتبر وقت تحدي ووقت ضغط على الشبكة .
ومدري وش قصد الاتصالات من العرض ، هل هو فرد عضلات ، ولا تحسين سمعة ، ولا اعتذار ، ولا نهب فلوس (هذي خالصين منها أصلاً 
) .
أذكر العيد اللي طاف كان جوالي مقطوع وشغلوه الاتصالات لعيوني (لفلوسي!) ولأني عميل مهم يقدرون يطلعون مني كم قرش في هاليومين ، وعناد فيهم قلت والله ما أدق على أحد .
والأيام هذي أشوف الاتصالات طايحين في كلمة (بدون قيود) لأنهم حسوا أنا حسينا أنهم يلعبون علينا (عبارة منمّقة ) .
خلونا ناخذ الإعلان ونفصفص فيه شوي :
أول شي اللي ماقرا الإعلان يلقاه هنا
الإتصالات السعودية STC تفتح المكالمات مجاناً من الجوال 24 ساعة خلال 30 يوماً
- الإعلان يقول 24 ساعة لمدة 30 يوم (يعني –أتوقع- أن لك 24 ساعة بس خلال الشهر تكون مكالماتك مجانية فيها وإذا تعدت مكالماتك 24 ساعة يبدأ يحسب عليك التكلفة ويمكن يضيف عليها تكلفة مكالماتك القديمة لأنك تعديت المدة وهي 24 ساعة !!).
- العرض يشمل الاتصال من الجوال أو الهاتف الثابت (يعني تدق من الثابت على جوال أرخص لك من أنك تدق على ثابت! والله أعلم يمكن يرفعون سعر مكالمات الثابت !).
- العرض للمكالمات داخل نفس الشبكة (يعني لازم تدق على رقم تبع الاتصالات ، قصدي لاتنخدع ببداية رقم خويك 055 أو 050 تلقاه محوّل لموبايلي ولا زين وأنت ماتدري وتقعد ترطن معه طول يومك).
- العرض قابل للإلغاء في أي لحظة (يعني يمكن يسوون زي تجوال موبايلي يقولون أن العرض مخالف لشروط هيئة الاتصالات ويحسبونها عليك).
شركة الإتصالات السعودية تؤكد على استمرارية حملة ( شكراً ) من STC وتقول أنه غير مخالف للقوانين
- العرض على شهر واحد بس (يعني يمكن إذا ماسددت فاتورة الشهر هذا تحسب عليك الشهر الجاي).
وبعد : هذي النصايح من شخص لعبوا عليه الاتصالات بعروضهم وأكلها على وجهه أكثر من مرة وأخذ موقف سلبي من كل دعايات الاتصالات (وياليتني ماخذ الموقف السلبي من أول ).
على جنب: -
الظاهر أن الاتصالات وموبايلي وزين كلهم راضعين من أم وحدة .
كنت ناوي أروح أسدد فاتورتي علشان أستفيد من العرض
بس الظاهر أبخليهم يستغلون أوقاتهم
وإن كان العرض صحيح أبشر بالي يدق ويخلي الخط مفتوح لمدة شهر
عندي إحساس كبير أنه كذب في كذب ومعروف من أول إنهم كذابين …
أما بالنسبة لفصفصة الإعلان فأنا معك في النقطة الأولى وهي مدة 24 ساعة في الشهر كامل …
جبتها يا حلو في الصميم …
حبيبك رائد
والله مهيب شينة .. والشعب المسكين يعرف كيف يقلق الاتصالات في الشغلات هذي المغازلجية واجد والنشبات على الجوال أوجد
.
هو صعب انك تقول كذب . لكن قل (احتيال) لأنهم يستخدمون العرض هذا عشان تزيد سرقتهم للفلوس # فقط لا غير #!
هههههههههههههههههههههههههههههههههههههههههههه
والرجال مفهي مدري من يصدق هههههههههههههههههههههههههه
الحركة جات بعد ماضرب الـ system حقهم هنا .. وصار فواتير الناس مرتفعه بهبالة!!
وصلت للألف وخمس مئة .. ومن ضمن الناس ذول الوالد ..
وشكلهم قاعدين يحاولوا يرقعوا ..
وإن كنت متأكد أن الموضوع فيه نصبة هنا ولا هناك ..
عموماً جميع شركات الاتصال هنا حراااامية والمكالمات غاااااالية!!
الله يعينكم [ مطلّع نفسه منها الأخ خخخخ ]
احسن شي سويته مع الاتصالات .. اني ما سددت فاتورة رقمي القديم ..
اتوقع هي ( وقيعة ) بالمواطنين كالعادة إحتيال مقنن وإلا فموسم اسمه عطلة ثم عيد وحجاج يحتاجون إلى شركة اتصالات وتترك الاتصالات هذه الفرصة ، أكاد جزم أنه مقلب كبير سيبلعه الكثير.
مع الأسف الرجال هذا اللي تتكلم عنه يمثل أغلب الشعب السعودي .
صحيح . والكلام هذا وصلني بسند متصل يرويه ثقة عن أحد المسؤولين في الاتصالات يذكر أن تغيير النظام أبرز أسباب العرض زي ماقلت يبو عمار
.. مدري عاد عن أسعار الاتصالات عندكم في ماليزيا 
هههههه يامجرم .. ترا يضيفون عليك كل شهر رسوم الخدمة .. والتسديد (غصبن) عليك
حسب ما أعرف .. أشوى أن جوالك اللي معك شحن ولاكان شفناك تشحذ عند المساجد 
صحيح وهذا اللي مهبل فيني .. مالقوا إلا هالوقت .. الشبكات مضغوطة بشكل غير طبيعي ولو استغلوها برفع أسعار المكالمات كان طلّعوا مكسب سنتين قدام
.. وخففوا شوي من الضغط اللي بيصير عليهم .. لكن الله أعلم باللي وراهم .
.
أسعدتني زيارة سماحة شرف سعادة حضرتك أخي شخص
الحمد لله اللي فكنا منهم..
الله يديم الرخص..
يعني ٢٥٠ ريال..
أنا فاتورتي شهريآ 67$ دولار..
وكلم 600 دقيقة في الشهر..
و 5 أرقام تكلمها مجانآ..
و 300 رسالة مجانآ..
ماشاء الله دلع يبو حمد .. شكلي بجي عندكم
شرفنا بتعليقك على ماقرأت
|[ معلومات التدوينة ]|
التصنيفات
أصدقاء التدوين
محطّات
تَوْتَرتُ قائِلاً:-
الكلمات المفتاحية
مرّوا من هنا
أسخف التدوينات!
من قارئ RSS